मुंबई, 17 एप्रिल (हिं.स.)। इंडियन प्रीमियर लीग (आयपीएल) २०२६ च्या सामना क्रमांक २४ मध्ये पंजाब किंग्सने वानखेडे स्टेडियमवर मुंबई इंडियन्सचा सात विकेट्सने पराभव करून शानदार विजय नोंदवला. मुंबईने प्रथम फलंदाजी करत १९६ धावा केल्या, मात्र पंजाब किंग्सने १६.३ षटकांत १९८/३ धावा करत लक्ष्य सहज गाठले। या विजयासह संघाने पाच सामन्यांत नऊ गुण मिळवून गुणतालिकेत आपले अव्वल स्थान मजबूत केले आहे. पंजाब किंग्सचे गोलंदाजी प्रशिक्षक साईराज बहुतुले यांनी संघाच्या सलामीवीर फलंदाज प्रभसिमरन सिंहचे भरभरून कौतुक केले. प्रभसिमरनने ३९ चेंडूंमध्ये नाबाद ८० धावांची खेळी केली, ज्यामध्ये त्याचा स्ट्राइक रेट २०० पेक्षा अधिक होता.

बहुतुले म्हणाले, “प्रभसिमरन एक उत्कृष्ट खेळाडू आहे. त्याची सातत्यपूर्ण कामगिरीच त्याला खास बनवते. तो प्रत्येक परिस्थितीनुसार स्वतःला जुळवून घेतो आणि संघाला मजबूत सुरुवात करून देतो. गेल्या काही वर्षांत आमच्या सातत्याने धावा करण्याच्या क्षमतेत त्याचा मोठा वाटा आहे.” त्यांनी प्रभसिमरनच्या यशाचे श्रेय मुख्य प्रशिक्षक रिकी पाँटिंग यांनाही दिले. बहुतुले म्हणाले, “ड्रेसिंग रूममध्ये रिकी पाँटिंग यांची उपस्थिती प्रत्येक खेळाडूवर सकारात्मक परिणाम करते. श्रेयस अय्यर आणि प्रभसिमरन यांनी याचा उत्तम फायदा घेतला आहे. रिकी आणि श्रेयस यांची जोडी संघासाठी उत्कृष्ट आहे.”

कर्णधार श्रेयस अय्यर यांनी या सामन्यात त्यांच्या फलंदाजीसोबतच एका शानदार झेलमुळेही सर्वांचे लक्ष वेधून घेतले. बहुतुले म्हणाले, “हा मी पाहिलेल्या सर्वोत्तम झेलांपैकी एक आहे आणि आयपीएलच्या इतिहासातही तो लक्षात ठेवला जाईल.”

ते पुढे म्हणाले, “श्रेयस एक उत्कृष्ट कर्णधार आहे आणि फलंदाजीत सामन्याचा कल बदलण्याची क्षमता त्याच्यात आहे.” गोलंदाजीत वेगवान गोलंदाज अर्शदीप सिंह याने उत्कृष्ट कामगिरी करत ३ बळी घेतले आणि किफायतशीर गोलंदाजी केली. त्याचे कौतुक करताना बहुतुले पुढे म्हणाले की, “त्याने नवीन चेंडूने उत्कृष्ट लाइन-लेंथ राखली आणि जुन्या चेंडूनेही अप्रतिम नियंत्रण दाखवले. वानखेडेसारख्या मैदानावर स्विंग मिळवणे सोपे नसते, पण त्यांनी ते उत्तम प्रकारे साध्य केले.”आता पंजाब किंग्स आपली शानदार लय कायम ठेवत १९ एप्रिल रोजी न्यू इंटरनॅशनल क्रिकेट स्टेडियम, न्यू चंदीगड येथे लखनौ सुपर जायंट्सविरुद्ध सामना खेळणार आहे.

---------------

हिंदुस्थान समाचार / Suraj Chaugule