वॉशिंग्टन, 12 मे (हिं.स.)।पश्चिम आशियातील वाढत्या तणावाच्या पार्श्वभूमीवर अमेरिकेचे अध्यक्ष डोनाल्ड ट्रम्प आता इराणच्या भूमिकेबाबत उघडपणे नाराजी व्यक्त करताना दिसत आहेत. अमेरिकन माध्यमांच्या अहवालानुसार, इराणकडून आलेल्या प्रस्तावांमुळे आणि ठप्प पडलेल्या चर्चेमुळे ट्रम्प प्रशासनात मोठी निराशा आहे. त्यामुळे वॉशिंग्टन पुन्हा एकदा इराणविरोधात लष्करी कारवाईचा पर्याय गांभीर्याने विचारात घेत असल्याचे सांगितले जात आहे.

या प्रकरणाशी संबंधित सूत्रांच्या माहितीनुसार, अणु कार्यक्रमावरील चर्चेत सतत निर्माण होत असलेला अडथळा आणि तेहरानची भूमिका ही ट्रम्प प्रशासनाच्या नाराजीची प्रमुख कारणे ठरत आहेत. अहवालानुसार, सामरिकदृष्ट्या अत्यंत महत्त्वाच्या होर्मुझ सामुद्रधुनीवरील इराणचे नियंत्रण कायम असल्याने ट्रम्प नाराज आहेत. तसेच, इराणी नेतृत्वातील अंतर्गत मतभेदांमुळे कोणतीही अर्थपूर्ण राजनैतिक प्रगती होत नसल्याचेही त्यांना वाटत आहे.सूत्रांनी सांगितले की, इराणच्या अलीकडील प्रतिक्रियेनंतर अमेरिकन प्रशासनातील अनेक वरिष्ठ अधिकाऱ्यांमध्ये हा प्रश्न उपस्थित होऊ लागला आहे की, तेहरान खरोखरच गंभीरपणे चर्चा करू इच्छित आहे का?

अहवालानुसार, पुढील रणनीतीबाबत ट्रम्प प्रशासनात मतभेद उघड झाले आहेत. प्रशासनातील काही अधिकारी, विशेषतः पेंटागॉनशी संबंधित अधिकारी, इराणवर अधिक आक्रमक दबाव आणण्याच्या बाजूने आहेत. त्यांचे मत आहे की, मर्यादित आणि लक्ष्यित लष्करी हल्ल्यांद्वारे तेहरानची स्थिती आणखी कमकुवत केली जाऊ शकते. तर दुसरा गट अजूनही राजनैतिक प्रयत्नांना थोडा अधिक वेळ देण्याच्या मताचा आहे.

एका अमेरिकन अधिकाऱ्याने सांगितले की, वॉशिंग्टन आणि तेहरान हे चर्चेकडे वेगवेगळ्या कालमर्यादा आणि दृष्टिकोनातून पाहत आहेत. अधिकाऱ्यांच्या मते, इराण अनेक दशकांपासून आर्थिक निर्बंध आणि दबावाचा सामना करत असल्याने ट्रम्प प्रशासनाला अपेक्षित असलेली तातडी त्यांना जाणवत नसावी.

सोमवारी ओव्हल ऑफिसमध्ये मातृ आरोग्य कार्यक्रमादरम्यान माध्यमांशी बोलताना ट्रम्प यांनी इराणच्या प्रस्तावावर उघड नाराजी व्यक्त केली. ते म्हणाले, “इराणने आम्हाला जो कचरा पाठवला, तो पूर्ण वाचण्याचीही मला गरज वाटली नाही. इराण सध्या लाइफ सपोर्टवर आहे. दोन्ही बाजूंमधील संघर्षविरामही कसाबसा टिकून आहे.” ट्रम्प यांच्या या वक्तव्यानंतर अमेरिकेकडून संभाव्य लष्करी कारवाईच्या चर्चांना आणखी वेग आला आहे. अहवालानुसार, सोमवारी ट्रम्प यांनी व्हाईट हाऊसमध्ये आपल्या राष्ट्रीय सुरक्षा टीमसोबत आणखी एक महत्त्वाची बैठक घेतली. या बैठकीत इराणविरोधातील पुढील रणनीती आणि संभाव्य पर्यायांवर चर्चा करण्यात आली.मात्र, या प्रकरणाशी संबंधित सूत्रांनी सांगितले की, ट्रम्प मंगळवारी दुपारी चीन दौऱ्यावर रवाना होण्यापूर्वी कोणताही मोठा निर्णय घेतला जाण्याची शक्यता सध्या कमी आहे.

---------------

हिंदुस्थान समाचार / Priyanka Bansode