कोलकाता, 19 मे (हिं.स.)आयपीएल २०२६ च्या प्लेऑफच्या शर्यतीतून आधीच बाहेर पडलेल्या मुंबई इंडियन्सला त्यांच्या अंतिम सामन्यांपूर्वी मोठा धक्का बसला आहे. त्यांचे दोन क्रिकेटपटू दुखापतीमुळे स्पर्धेतून बाहेर पडले आहेत. मुंबई इंडियन्सने जाहीर केले आहे की, यष्टीरक्षक-फलंदाज क्विंटन डी कॉक आणि युवा अष्टपैलू खेळाडू राज अंगद बावा आता आयपीएल २०२६ मध्ये सहभागी होऊ शकणार नाहीत. आयपीएलमध्ये मुंबईचे अजून दोन सामने बाकी आहेत: एक कोलकाता नाईट रायडर्सविरुद्ध आणि दुसरा राजस्थान रॉयल्सविरुद्ध.

मुंबईने सांगितले की, डी कॉकला डाव्या मनगटाची दुखापत झाली आहे, तर बावाला उजव्या अंगठ्यातील लिगामेंट फाटल्यामुळे स्पर्धेतून बाहेर पडावे लागले आहे. या दक्षिण आफ्रिकी यष्टीरक्षक-फलंदाजाला २९ एप्रिल रोजी सनरायझर्स हैदराबादविरुद्धच्या सामन्यापूर्वी ही दुखापत झाली होती. बावाला पंजाब किंग्सविरुद्ध खेळताना दुखापत झाली. दोघेही मायदेशी परतले असून मुंबई इंडियन्सच्या वैद्यकीय संघाच्या देखरेखीखाली त्यांच्यावर पुनर्वसन उपचार केले जातील.

डी कॉक आणि बावा या दोघांनी या हंगामात प्रत्येकी तीन सामने खेळले आहेत. डी कॉकचा शेवटचा सामना २३ एप्रिल रोजी चेन्नई सुपर किंग्सविरुद्ध झाला होता. त्याने आपल्या पहिल्याच सामन्यात शतक झळकावले आणि ११२ धावांची नाबाद खेळी केली. तथापि, त्यानंतर तो केवळ १३ आणि ७ धावाच करू शकला. त्यानंतर त्याला संघातून वगळण्यात आले. बावा शेवटचा १४ मे रोजी पंजाबविरुद्ध खेळला होता. या हंगामात तो केवळ १६ धावा करू शकला आणि त्याने दोन बळी घेतले.

मुंबईने यापूर्वी डावखुरा फिरकी गोलंदाज मिचेल सँटनरला दुखापतीमुळे गमावले होते. त्याच्या जागी केशव महाराजची निवड करण्यात आली. दरम्यान, भारतीय फिरकी गोलंदाज अथर्व अंकोलेकर संघाबाहेर गेल्याने क्रिश भगतची निवड करण्यात आली. मुंबई सध्या १० संघांच्या गुणतालिकेत १२ सामन्यांतून आठ गुणांसह नवव्या स्थानावर आहे. त्यांचा पुढील सामना २० मे रोजी कोलकाता येथे केकेआरविरुद्ध आहे.

---------------

हिंदुस्थान समाचार / वृषाली देशपांडे