मुंबई, 19 मे (हिं.स.)भारतीय क्रिकेट नियामक मंडळाने (बीसीसीआय) पुढील महिन्यात अफगाणिस्तानविरुद्ध होणाऱ्या एकमेव कसोटीसाठी भारतीय संघाची घोषणा केली आहे. या सामन्यात शुभमन गिल भारतीय संघाचे नेतृत्व करेल. दरम्यान, सहा महिन्यांनंतर ऋषभ पंतकडून कसोटी उपकर्णधारपद काढून घेण्यात आले आहे. केएल राहुलला कसोटी उपकर्णधारपद देण्यात आले आहे. गुरनूर ब्रार आणि मानव सुथार हे कसोटी संघात नवीन चेहरे आहेत.

भारताने शेवटची कसोटी मालिका डिसेंबर-जानेवारीमध्ये दक्षिण आफ्रिकेविरुद्ध खेळली होती. मायदेशात झालेल्या कसोटी मालिकेत भारतीय संघाला ०-२ असा पराभव पत्करावा लागला होता आणि आता संघ या फॉरमॅटमध्ये पुनरागमन करण्याच्या प्रयत्नात असेल. जसप्रीत बुमराहला दोन्ही फॉरमॅटमधून विश्रांती देण्यात आली आहे. अष्टपैलू हर्ष दुबेचाही पहिल्यांदाच कसोटी संघात समावेश करण्यात आला आहे. गुरनूर आणि हर्ष यांचा भारतीय संघात दोन्ही फॉरमॅटमध्ये समावेश आहे. सलामीची जबाबदारी पुन्हा एकदा केएल राहुल आणि यशस्वी यांच्यावर असणार आहे.

मधल्या फळीत सुदर्शन, पडिक्कल, पंत आणि गिल यांचा समावेश असेल. जुरेल राखीव यष्टीरक्षक म्हणून संघात आहे. सुंदर, कुलदीप आणि सुथार यांचा फिरकी गोलंदाज म्हणून समावेश आहे. सिराज, प्रसिद्ध आणि गुरनूर वेगवान गोलंदाजीची धुरा सांभाळणार आहेत.

आयपीएल २०२६ हंगामाचा अंतिम सामना ३१ मे रोजी अहमदाबाद येथे होणार आहे. यानंतर, ६ जून रोजी मुल्लानपूर येथे अफगाणिस्तानविरुद्ध एकच कसोटी सामना खेळला जाईल. गेल्या काही वर्षांत कसोटी क्रिकेटमध्ये भारताची कामगिरी खराब राहिली आहे, अगदी मायदेशातही त्यांना पराभव पत्करावा लागला आहे. त्यामुळे, गिलच्या नेतृत्वाखालील संघाला स्वतःची क्षमता आजमावण्याची चांगली संधी मिळेल. भारत आणि अफगाणिस्तान यांच्यातील हा कसोटी सामना जागतिक कसोटी चॅम्पियनशिपचा भाग नसेल.

अफगाणिस्तानविरुद्धच्या कसोटीसाठी भारतीय संघः

शुभमन गिल (कर्णधार), यशस्वी जैस्वाल, केएल राहुल (उपकर्णधार), ऋषभ पंत (यष्टीरक्षक), साई सुदर्शन, देवदत्त पडिक्कल, नितीश रेड्डी, ध्रुव जुरेल, वॉशिंग्टन सुंदर, कुलदीप यादव, मोहम्मद सिराज, प्रसीद कृष्णा, मानव सुथार, हर्ष दुबे आणि गुरनूर ब्रार.

--------------

हिंदुस्थान समाचार / वृषाली देशपांडे