नवी दिल्ली, 25 मे (हिं.स.)। बीजू जनता दल (बीजेडी) चे वरिष्ठ नेते देबाशीष सामंतराय यांनी सोमवारी राज्यसभा सदस्यत्वाचा राजीनामा दिला. त्यांनी राज्यसभेचे सभापती आणि उपराष्ट्रपती सीपी राधाकृष्णन यांच्याकडेही आपला राजीनामा सादर केला. यापूर्वी त्यांनी बीजेडी अध्यक्ष नवीन पटनायक यांना पत्र लिहून पक्षाच्या प्राथमिक सदस्यत्वाचाही राजीनामा जाहीर केला होता. त्यांनी पक्ष नेतृत्वावर उपेक्षेचा आरोप केला.

नवी दिल्लीत सभापतींकडे राजीनामा सादर केल्यानंतर त्यांनी पत्रकारांशी संवाद साधताना सांगितले की, सकाळी त्यांनी बीजेडी अध्यक्ष नवीन पटनायक यांना प्राथमिक सदस्यत्वाच्या राजीनाम्याचे पत्र पाठवले. त्या पत्रात त्यांनी काही कारणे नमूद केली होती. त्यानंतर ते राज्यसभा सदस्यत्वाचा राजीनामा देण्यासाठी गेले.

सामंतराय म्हणाले, “बीजेडीमध्ये माझे कोणतेही भविष्य नसल्याचे मला वाटले, कारण पक्ष अजूनही वीके पांडियन यांच्या प्रभावाखाली चालत आहे. पक्षाच्या निवडणुकीतील पराभवाबाबत नेतृत्व आत्मपरीक्षण करण्यास तयार नाही.” त्यांनी सांगितले की, एखाद्या गैर-राजकीय व्यक्तीला अतिप्रमाणात राजकीय जबाबदारी दिल्यामुळे पक्षाची प्रतिमा आणि संघटना या दोन्हींना नुकसान झाले. भारतीय जनता पक्षात प्रवेश करण्याच्या शक्यतेबाबत त्यांनी सांगितले की, एक राजकारणी म्हणून त्यांनी आपले सर्व पर्याय खुले ठेवले आहेत आणि लवकरच परिस्थिती स्पष्ट होईल. भाजप त्यांच्या दृष्टीने सर्वोत्तम राजकीय पर्याय ठरू शकतो, असेही त्यांनी म्हटले.

सामंतराय म्हणाले की, माजी पंतप्रधान अटल बिहारी वाजपेयी यांच्या काळात बीजेडीने भाजपसोबत युती करून सरकार चालवले होते, त्यामुळे भाजपसोबत जाण्यात कोणतीही वैचारिक अस्वस्थता नाही. ओडिशामध्ये भाजप सत्तेत येण्यामागे बीजेडी नेतृत्वाच्या चुका आणि वीके पांडियन यांची भूमिका ही प्रमुख कारणे होती, असा दावाही त्यांनी केला.

तथापि, त्यांनी नवीन पटनायक यांच्या कारभाराला वाईट ठरवले नाही आणि २५ वर्षांच्या शासनकाळात प्रशासकीय पातळीवर गंभीर अपयश आले नव्हते, मात्र पक्ष संघटना कमकुवत झाली होती, असे त्यांनी सांगितले.

---------------

हिंदुस्थान समाचार / Suraj Chaugule