अक्षय कुमार आणि अक्षरा सिंहची भन्नाट केमिस्ट्री चर्चेत

मुंबई, 25 मे (हिं.स.)। वेलकम टू द जंगल हा बहुचर्चित चित्रपट पुढील महिन्यात प्रेक्षकांच्या भेटीला येणार असून प्रदर्शना आधीच चित्रपटाने जोरदार चर्चा रंगवली आहे. ट्रेलर आणि आधी प्रदर्शित झालेल्या गाण्यांमुळे प्रेक्षकांमध्ये चित्रपटाबद्दल मोठी उत्सुकता निर्माण झाली आहे. हीच उत्सुकता कायम ठेवण्यासाठी निर्मात्यांनी आता चित्रपटातील नवे गाणे ‘घिस-घिस-घिस’ प्रदर्शित केले असून हे गाणे प्रदर्शित होताच सामाजिक माध्यमांवर मोठ्या प्रमाणात व्हायरल झाले आहे.

सोमवारी अक्षय कुमार यांनी त्यांच्या इन्स्टाग्राम खात्यावर या गाण्याचा प्रोमो शेअर करत चाहत्यांना नव्या गाण्याबद्दल माहिती दिली. त्यांनी पोस्टमध्ये लिहिले की, “जर तुमचे आयुष्य थोडे कंटाळवाणे वाटत असेल, तर 'घिस-घिस-घिस'ने मूड बदलण्याची वेळ आली आहे. गाणे आता प्रदर्शित झाले आहे. ‘वेलकम टू द जंगल’ २६ जून २०२६ रोजी चित्रपटगृहांत धुमाकूळ घालणार आहे.”

हे गाणे पूर्णपणे भोजपुरी शैलीत तयार करण्यात आले असून ते चित्रपटातील आयटम गाण्यांपैकी एक मानले जात आहे. गाण्याचे बोल साबण आणि विनोदी शैलीभोवती फिरणारे आहेत. या गाण्यात अक्षय कुमारसोबत भोजपुरी अभिनेत्री आणि गायिका अक्षरा सिंह झळकत असून दोघांची जोडी प्रेक्षकांना विशेष भावत आहे. भोजपुरी गाण्यांमध्ये आढळणारी ऊर्जा, विनोद आणि ठेका या गाण्यात ठळकपणे दिसून येत असल्याने सर्व प्रकारच्या प्रेक्षकांपर्यंत हे गाणे पोहोचण्याची शक्यता व्यक्त केली जात आहे.

‘घिस-घिस-घिस’ या गाण्याला विक्रम मॉन्ट्रोज आणि सुप्रिया पाठक यांनी आवाज दिला आहे. विक्रम मॉन्ट्रोज यांनीच संगीतबद्धही केले असून गीतकार म्हणून अभिनव शेखर यांनी काम पाहिले आहे. हुक आयडियाची जबाबदारी इश्तेयाक मुस्ताक यांनी सांभाळली असून संगीत निर्मितीत आकाश यादव आणि विक्रम मॉन्ट्रोज यांचे योगदान आहे.

ट्रेड एनालिस्ट तरण आदर्श यांनीदेखील या गाण्याचे कौतुक केले आहे. त्यांच्या मते, ‘वेलकम टू द जंगल’मधील हे सर्वात धमाकेदार गाणे ठरत असून भोजपुरी आणि बॉलिवूड शैलीचा अनोखा संगम यात पाहायला मिळत आहे.

चित्रपटात सुनील शेट्टी, दिशा पटानी, रवीना टंडन, जॅकलिन फर्नांडिस, अर्शद वारसी, जॅकी श्रॉफ, परेश रावल, आणि राजपाल यादव यांच्यासह अनेक कलाकार महत्त्वाच्या भूमिकांमध्ये दिसणार आहेत. दिग्दर्शक अहमद खान यांच्या दिग्दर्शनाखाली तयार झालेला हा चित्रपट २६ जून २०२६ रोजी प्रदर्शित होणार आहे.

---------------

हिंदुस्थान समाचार / Suraj Chaugule