गडचिरोली., 11 जून (हिं.स.)

गडचिरोली जिल्ह्यातील चामोर्शी शहरात एका सात वर्षीय चिमुरडीवर झालेल्या अत्यंत संतापजनक आणि अमानुष अत्याचाराच्या घटनेने संपूर्ण जिल्हा हादरला आहे. या घटनेचे तीव्र पडसाद गुरुवारी चामोर्शी शहरात उमटले. नराधम आरोपीला तात्काळ फाशीची शिक्षा व्हावी, या प्रमुख मागणीसाठी हजारो संतप्त नागरिक, महिला आणि विविध संघटनांचे पदाधिकारी रस्त्यावर उतरले. गुरुवारी पुकारण्यात आलेल्या कडकडीत बंद दरम्यान 'जनआक्रोश मोर्चा' काढत नागरिकांनी थेट पोलिस ठाण्यावर धडक दिली.

व्यापाऱ्यांचा स्वयंस्फूर्त बंद; बाजारपेठा ठप्प

घटनेचा निषेध नोंदवण्यासाठी गुरुवारी सकाळपासूनच चामोर्शी शहरातील मुख्य बाजारपेठ, दुकाने, हॉटेल्स आणि व्यावसायिक प्रतिष्ठाने कडकडीत बंद ठेवण्यात आली होती. व्यापाऱ्यांनी या बंदला स्वयंस्फूर्त पाठिंबा दिला. शहरात केवळ अत्यावश्यक सेवा सुरू होत्या. या घटनेमुळे संपूर्ण चामोर्शी शहरात प्रचंड संतापाचे आणि तणावाचे वातावरण निर्माण झाले आहे.

हजारो महिला आणि नागरिकांचा जनआक्रोश मोर्चा

दुपारच्या सुमारास शहरातील प्रमुख मार्गावरून भव्य 'जनआक्रोश मोर्चा' काढण्यात आला. या मोर्चामध्ये महिलांची संख्या लक्षणीय होती. हातात निषेधाचे फलक घेऊन आणि नराधमाला फाशी द्या, बलात्काऱ्यांना तात्काळ शासन करा अशा घोषणा देत आंदोलकांनी चामोर्शी परिसर दणाणून सोडला. समाजातील विविध राजकीय, सामाजिक आणि सामाजिक संघटनांचे पदाधिकारीही या मोर्चात हिरीरीने सहभागी झाले होते.

पोलिस ठाण्यावर धडक आणि प्रशासनाला निवेदन

मोर्चा थेट स्थानिक पोलिस ठाण्यावर धडकल्यानंतर त्याचे रूपांतर जाहीर सभेत झाले. आंदोलकांनी पोलिस प्रशासनाविरोधात आणि आरोपीविरोधात तीव्र संताप व्यक्त केला. नागरिकांच्या एका शिष्टमंडळाने पोलिस प्रशासनाला निवेदन सादर केले.

नागरिकांची मुख्य मागणी:

या प्रकरणाचा तपास जलदगती (फास्ट ट्रॅक) कोर्टात चालवून नराधम आरोपीला कठोरात कठोर म्हणजेच फाशीचीच शिक्षा झाली पाहिजे, जेणेकरून भविष्यात अशा विकृत कृत्याला आळा बसेल.

पोलिस प्रशासनाकडून कडक बंदोबस्त

घटनेचे गांभीर्य आणि नागरिकांचा वाढता रोष लक्षात घेता चामोर्शी शहरात मोठा पोलिस बंदोबस्त तैनात करण्यात आला आहे. कायदा व सुव्यवस्था बिघडू नये म्हणून वरिष्ठ पोलिस अधिकारी परिस्थितीवर बारीक लक्ष ठेवून आहेत. पोलिसांनी आरोपीला अटक केली असून, त्याच्यावर कडक कलमांखाली गुन्हा दाखल करण्यात आला आहे. तसेच या प्रकरणाचा तपास अत्यंत गंभीरतेने सुरू असल्याचे आश्वासन पोलिसांनी आंदोलकांना दिले.या घटनेमुळे बालकांच्या सुरक्षेचा प्रश्न पुन्हा एकदा ऐरणीवर आला असून, पीडित चिमुरडीला आणि तिच्या कुटुंबाला लवकरात लवकर न्याय मिळावा, अशी आग्रही मागणी संपूर्ण गडचिरोली जिल्ह्यातून होत आहे.

---------------

हिंदुस्थान समाचार / Milind Khond