बर्मिंगहॅम, 13 जून (हिं.स.)भारतीय महिला संघ रविवारी आयसीसी टी-२० विश्वचषक स्पर्धेत आपल्या मोहिमेला सुरुवात करणार आहे. गट १ च्या सामन्यात भारताचा सामना कट्टर प्रतिस्पर्धी पाकिस्तानशी होईल. या जागतिक स्पर्धेत भारत आणि पाकिस्तान यांच्यात कोणतीही स्पर्धात्मक चुरस दिसत नाही. या संघाविरुद्ध भारताची कामगिरी चांगली आहे, पण हरमनप्रीत कौरच्या नेतृत्वाखालील संघ कोणतीही चूक न करता विजय मिळवण्यासाठी प्रयत्नशील असणार आहे.

भारत आणि पाकिस्तान यांच्यात आतापर्यंत 16 टी-२० सामने खेळले गेले आहेत. भारतीय महिला संघाने १३ सामने जिंकले आहेत, तर पाकिस्तानने तीन सामने जिंकले आहेत.जर आपण टी-२० विश्वचषकातील दोन्ही संघांमधील सामन्यांबद्दल विचार केला, तर ते आठ वेळा हे संघ आमनेसामने आले आहेत.भारताने सहा वेळा विजय मिळवला आहे, तर पाकिस्तानने केवळ दोन वेळा विजय मिळवला आहे. २०२४ च्या टी-२० विश्वचषकातही भारत आणि पाकिस्तान यांच्यात एक सामना झाला होता. या सामन्यात भारतीय महिला संघाने सहा गडी राखून विजय मिळवला होता.

भारतीय संघ पाकिस्तानविरुद्ध सलामीवीर स्मृती मंधाना आणि शफाली वर्मा यांच्याकडून एका भक्कम सुरुवातीची अपेक्षा करत असेल. फेब्रुवारीमध्ये ऑस्ट्रेलियाविरुद्ध ८२ धावा केल्यानंतर, मंधानाने पुढील सहा सामन्यांमध्ये १३, १२, ३७, ०, ३२ आणि ८ धावा केल्या. शफालीने जोहान्सबर्गमध्ये ६४ धावा केल्यानंतर, पुढील पाच सामन्यांमध्ये ९, ४, २, २२ आणि ११ धावा केल्या. हरमनप्रीत कौरने दक्षिण आफ्रिका आणि इंग्लंडविरुद्ध अर्धशतके झळकावून पुनरागमन केले होते. जेमिमा रॉड्रिग्स, रिचा घोष आणि भारती फुलमाली यांच्यावरही धावा करण्याची जबाबदारी असेल. भारत या सामन्यासाठी भारतीला अंतिम ११ क्रिकेटपटूंमध्ये स्थान देण्याची शक्यता आहे.

गेल्या वर्षी एकदिवसीय विश्वचषक जिंकणाऱ्या हरमनप्रीत कौरच्या नेतृत्वाखाली, भारत सलग दुसऱ्या आयसीसी विजेतेपदाच्या शोधात आहे. पाकिस्तानविरुद्धही भारताची कामगिरी उत्कृष्ट आहे आणि ही लय कायम ठेवणे संघासाठी फायदेशीर ठरेल. भारताच्या पहिल्या सामन्यातील विजयामुळे त्यांचे मनोधैर्य वाढेल. भारतीय संघ एका कठीण गटात आहे, ज्यात ऑस्ट्रेलिया आणि दक्षिण आफ्रिकेसारखे बलाढ्य संघ आहेत. भारतासाठी दिलासादायक बाब ही आहे की, गेल्या वर्षीच्या एकदिवसीय विश्वचषक विजेत्या संघातील बहुतेक क्रिकेटपटू या टी-२० विश्वचषक संघातही आहेत. भारतीय संघ आपल्या अंतिम ११ क्रिेकेटपटूंमध्ये मोठे बदल करण्याची शक्यता कमी आहे.

---------------

हिंदुस्थान समाचार / वृषाली देशपांडे