लातूर, ५ जून (हिं.स.) : परराज्यातील खासगी प्रवासी बसवर कारवाई करताना परिवहन विभागाच्या पथकाने लाच मागितल्याचा आरोप सोशल मीडिया आणि काही वृत्त माध्यमांमधून करण्यात आला होता. मात्र, ही बातमी चुकीची आणि दिशाभूल करणारी असल्याचे उप प्रादेशिक परिवहन अधिकारी कार्यालयाने स्पष्ट केले आहे.
उप प्रादेशिक परिवहन अधिकारी कार्यालयाने दिलेल्या माहितीनुसार, एआर-२०-डी-३७८६ क्रमांकाच्या परराज्यातील प्रवासी बसवर महाराष्ट्र राज्याचा वैध परवाना नसणे, कर न भरणे तसेच मोटार वाहन कायद्याचे विविध उल्लंघन केल्याप्रकरणी नियमानुसार कारवाई करण्यात आली होती. या कारवाईअंतर्गत वाहनधारकाकडून ३५ हजार ९६० रुपयांचा दंड आकारण्यात आला.
विभागाच्या म्हणण्यानुसार, तपासणीदरम्यान अधिकाऱ्यांनी किंवा कर्मचाऱ्यांनी कोणत्याही प्रकारची लाच मागितलेली नसून, लाचखोरीचा आरोप पूर्णपणे निराधार आहे. संबंधित वाहनधारकाने आकारण्यात आलेला संपूर्ण दंड शासनाच्या अधिकृत यंत्रणेद्वारे ऑनलाईन पद्धतीने भरला असल्याचेही स्पष्ट करण्यात आले आहे.
यापूर्वीही अनेकदा कारवाई
संबंधित बसवर यापूर्वीही विविध नियमभंगांमुळे दंडात्मक कारवाई करण्यात आली होती. त्यानुसार:
७ एप्रिल २०२६ रोजी – ३,६५० रुपये दंड
१३ मे २०२६ रोजी – ३,००० रुपये दंड
१९ मे २०२६ रोजी – ३५,९६० रुपये दंड
हे सर्व दंड वाहनधारकाने नियमानुसार ऑनलाईन पद्धतीने भरल्याची नोंद विभागाकडे असल्याचे सांगण्यात आले. या प्रकरणात परिवहन विभागाची प्रतिमा मलीन करण्याच्या उद्देशाने चुकीची माहिती प्रसारित केल्याचा आरोप करत संबंधित वाहन चालकाविरुद्ध लातूर ग्रामीण पोलीस ठाण्यात गुन्हा दाखल करण्यात आला आहे.उप प्रादेशिक परिवहन अधिकारी कार्यालयाने नागरिकांना सोशल मीडियावरील अप्रमाणित माहिती आणि अफवांवर विश्वास न ठेवण्याचे आवाहन केले आहे. कोणतीही माहिती पडताळून पाहिल्यानंतरच ती पुढे प्रसारित करावी, असेही विभागाने स्पष्ट केले आहे.
ठळक मुद्दे
प्रवासी बसवरील कारवाईदरम्यान लाच मागितल्याचा आरोप फेटाळला
महाराष्ट्राचा परवाना नसल्याने आणि कर न भरल्याने बसवर कारवाई
३५,९६० रुपयांचा दंड आकारून ऑनलाईन वसुली
संबंधित वाहनावर यापूर्वीही अनेक दंडात्मक कारवाया
चुकीची माहिती प्रसारित केल्याप्रकरणी चालकाविरुद्ध गुन्हा दाखल
नागरिकांना अफवांपासून सावध राहण्याचे आवाहन
परिवहन विभागाने या प्रकरणात सर्व कारवाई कायदेशीर आणि पारदर्शक पद्धतीने झाल्याचा दावा करत, विभागाविरोधात पसरविण्यात आलेल्या आरोपांमध्ये कोणतेही तथ्य नसल्याचे स्पष्ट केले आहे.
--------------------
हिंदुस्थान समाचार / Mahesh Madanrao Chitnis
