तेहरान, 05 जून (हिं.स.)।अमेरिका आणि इस्रायलने २८ फेब्रुवारी २०२६ रोजी तेहरानवर केलेल्या हल्ल्याबाबत इराणचे परराष्ट्रमंत्री अब्बास अराघची यांनी धक्कादायक खुलासा केला आहे. अराघची यांनी सांगितले की, तेहरानमधील तत्कालीन सर्वोच्च नेते अली खामेनेई यांच्या कार्यालयावर हल्ला झाला तेव्हा आम्ही स्वतः त्या इमारतीत उपस्थित होतो.

शुक्रवारी बोलताना अब्बास अराघची यांनी दावा केला की, हल्ल्यानंतर ते ढिगाऱ्यातून बाहेर पडले आणि पुढील दोन दिवस अली खामेनेई यांच्या स्थितीबाबत भीती आणि अनिश्चिततेत होते. त्यानंतर १ मार्च रोजी खामेनेई यांच्या मृत्यूची अधिकृत पुष्टी करण्यात आली. अराघची यांनी स्पष्ट केले की, आता इराणची संपूर्ण सत्ता मोजतबा खामेनेई यांच्या हातात आहे.

अराघची म्हणाले की, वारंवार सुरक्षित ठिकाणी जाण्याचा सल्ला देऊनही अली खामेनेई यांनी तो नाकारला होता. ते म्हणाले होते, “इराणमधील प्रत्येक नागरिकाला सुरक्षित आश्रय मिळत नाही तोपर्यंत मी कोणत्याही बंकरमध्ये किंवा सुरक्षित स्थळी जाणार नाही. माझ्या जनतेसोबत जे होईल, तेच माझ्यासोबतही होईल.”

अराघची यांनी तेहरानकडून आखाती देशांना दिलेल्या पूर्वसूचनेकडेही लक्ष वेधले. त्यांनी सांगितले की, इराणविरोधात अमेरिकन लष्करी तळांचा वापर केल्यास त्याला प्रत्युत्तर मिळणारच होते. अमेरिकेच्या सुरक्षा धोरणावर टीका करताना ते म्हणाले की, जर इराणच्या शेजारील देशांमध्ये अमेरिकेचे लष्करी तळ नसते, तर त्या देशांवर प्रतिहल्ल्याची वेळ आली नसती.

ते पुढे म्हणाले की, या प्रदेशातील सरकारांनी त्यांच्या भूमीचा अशा प्रकारे वापर करण्यास विरोध दर्शविला होता, तरीही वॉशिंग्टनने आपली भूमिका कायम ठेवली. इराणच्या प्रत्युत्तरामुळे अमेरिकेचे राष्ट्राध्यक्ष डोनाल्ड ट्रम्प आणि इस्रायलचे पंतप्रधान बेंजामिन नेतान्याहू यांच्यासह सर्व विरोधक आश्चर्यचकित झाले, असा दावा त्यांनी केला. अराघची म्हणाले, “हल्ल्याची तीव्रता प्रचंड असली तरी इराण इतक्या वेगाने आणि शक्तिशाली पद्धतीने प्रत्युत्तर देईल, अशी कुणालाही अपेक्षा नव्हती.”

इराणच्या नेतृत्वाबाबत बोलताना अराघची यांनी ठामपणे सांगितले की, अली खामेनेई यांचे पुत्र आणि उत्तराधिकारी मोजतबा खामेनेई यांच्याकडे आता पूर्ण अधिकार आहेत. ते म्हणाले की, मोजतबा खामेनेई सध्याच्या घडामोडींमध्ये अत्यंत प्रभावशाली भूमिका बजावत असून देशाच्या सत्तेची सूत्रे पूर्णपणे त्यांच्या हाती आहेत.

मोजतबा खामेनेई यांच्या प्रकृती आणि वास्तव्याबाबत विविध बातम्या समोर येत असताना, अराघची यांनी सांगितले की नव्या सर्वोच्च नेत्यांशी सातत्याने संपर्क सुरू आहे आणि त्यांचे निर्देश कोणत्याही अडथळ्याशिवाय अंमलात आणले जात आहेत.

अली खामेनेई यांच्या निधनाबाबत बोलताना अराघची म्हणाले, “शहीद नेत्याप्रती दाखवण्यात आलेली निष्ठा आणि आज्ञाधारकता ज्या पातळीवर होती, तीच निष्ठा आणि समर्पण इस्लामी क्रांतीचे नवे नेते मोजतबा खामेनेई यांच्याप्रतीही कायम आहे.”

---------------

हिंदुस्थान समाचार / Priyanka Bansode