पुणे, ५ जून (हिं.स.) : पुणे जिल्हा स्थानिक स्वराज्य संस्था मतदारसंघाच्या विधान परिषद निवडणुकीत उमेदवार बिनविरोध निवडून आल्याने लागू असलेली आचारसंहिता लवकरच शिथिल होणार आहे. त्यामुळे आचारसंहितेमुळे रखडलेल्या अनेक महत्त्वाच्या प्रशासकीय निर्णयांना आणि विकासकामांना गती मिळण्याची शक्यता निर्माण झाली असून, पुणे महापालिकेला मोठा दिलासा मिळाला आहे.
आचारसंहितेमुळे शहरातील संभाव्य पाणीकपात, पालखी सोहळ्याच्या तयारीसाठी आवश्यक निविदा प्रक्रिया तसेच पावसाळ्यापूर्वीची विविध तातडीची विकासकामे प्रलंबित राहिली होती. निवडणूक प्रक्रिया पूर्ण होईपर्यंत महापालिकेला कोणतेही धोरणात्मक किंवा आर्थिक निर्णय घेता येत नसल्याने अनेक महत्त्वाचे विषय रखडले होते.
आचारसंहितेच्या कालावधीत जिल्हा प्रशासनाने तातडीच्या कामांसाठी बैठका घेण्यास परवानगी दिली होती. मात्र, त्या बैठकींमध्ये कोणतेही धोरणात्मक अथवा आर्थिक निर्णय घेण्यास मनाई करण्यात आली होती. परिणामी महापालिकेच्या दैनंदिन आणि विकासात्मक कामकाजावर परिणाम झाला.
पालखी सोहळा आणि पाणीपुरवठा प्रश्न प्राधान्यावर
जुलैच्या पहिल्या आठवड्यात होणाऱ्या पालखी सोहळ्याच्या तयारीसाठी आवश्यक कामांच्या निविदा प्रक्रियेलाही विलंब झाला आहे. दरम्यान, खडकवासला धरणातील पाणीसाठा घटल्याने शहरात दिवसाआड पाणीपुरवठा करण्याचा पर्याय प्रशासनाच्या विचाराधीन आहे.
आचारसंहिता शिथिल झाल्यानंतर या विषयावर महापालिकेतील सत्ताधारी आणि विरोधी पक्षांच्या प्रमुखांची बैठक घेऊन अंतिम निर्णय घेतला जाण्याची शक्यता आहे.
विकासकामांना मिळणार वेग
पावसाळ्यापूर्वी हाती घ्यावयाच्या विविध कामांशी संबंधित प्रस्ताव आणि मंजुरी प्रक्रियेलाही आता वेग मिळण्याची अपेक्षा व्यक्त केली जात आहे. त्यामुळे सोमवार (८ जून) नंतर महापालिकेचे नियमित कामकाज पूर्ववत सुरू होण्याची शक्यता आहे.दरम्यान, महापालिकेने नुकत्याच घेतलेल्या अभियंता भरती परीक्षेचा निकालही पुढील काही दिवसांत जाहीर होण्याची शक्यता असून, हजारो उमेदवारांचे लक्ष त्याकडे लागले आहे.
ठळक मुद्दे
विधान परिषद निवडणुकीत उमेदवार बिनविरोध निवडून आल्याने आचारसंहिता शिथिल होणार
पुणे महापालिकेच्या रखडलेल्या निर्णयांना मिळणार गती
पालखी सोहळ्याच्या तयारीसाठीच्या निविदा प्रक्रियेला वेग येणार
संभाव्य पाणीकपातीबाबत लवकरच निर्णय अपेक्षित
पावसाळ्यापूर्वीची विकासकामे मार्गी लागण्याची शक्यता
अभियंता भरती परीक्षेचा निकाल लवकर जाहीर होण्याची शक्यता
आचारसंहिता संपुष्टात आल्यानंतर पुणे महापालिकेच्या विविध प्रलंबित कामांना गती मिळणार असून, शहराच्या दृष्टीने महत्त्वाचे अनेक निर्णय पुढील काही दिवसांत होण्याची शक्यता व्यक्त केली जात आहे.
-------------------
हिंदुस्थान समाचार / भूषण राजगुरु
