नवी दिल्ली, 01 जुलै (हिं.स.)। आधुनिक महाराष्ट्राचे शिल्पकार आणि हरित क्रांतीचे जनक वसंतराव नाईक यांच्या जयंतीनिमित्त आज राजधानीत त्यांना अभिवादन करण्यात आले.

कोपरनिकस मार्ग स्थित महाराष्ट्र सदनातील सभागृहात आयोजित कार्यक्रमात निवासी आयुक्त तथा सचिव श्वेता सिंघल यांनी वसंतराव नाईक यांच्या प्रतिमेस पुष्प अर्पण करून अभिवादन केले.

महाराष्ट्र परिचय केंद्राचे संचालक हेमराज बागुल, सहायक निवासी आयुक्त नितीन शेंडे, जनसंपर्क अधिकारी मनीषा पिंगळे, निवासी उपअभियंता जमुनाप्रसाद गंगवार आणि महाराष्ट्र सदनाचे व्यवस्थापक प्रमोद कोलपते, सहायक लेखाधिकारी निलेश केदारे यांच्यासह इतर अधिकारी व कर्मचाऱ्यांनीही प्रतिमेस पुष्प अर्पण करून आदरांजली वाहिली.

याप्रसंगी व्यवस्थापक प्रमोद कोलपते यांनी वसंतराव नाईक यांनी महाराष्ट्राच्या सर्वांगीण विकासासाठी दिलेल्या अतुलनीय योगदानाचा परिचय करून दिला.

---------------

हिंदुस्थान समाचार / हर्षदा गावकर