मुंबई, 20 जुलै (हिं.स.)। ॲपलने आपल्या लोकप्रिय म्युझिक स्ट्रिमिंग सेवेच्या ॲपल म्युझिकच्या सबस्क्रिप्शन दरात वाढ करण्याचा निर्णय घेतला असून भारतासह अमेरिका, युनायटेड किंगडम, युरोप आणि इतर अनेक बाजारपेठांमध्ये नव्या किंमती लागू झाल्या आहेत. काही दिवसांपूर्वी मॅक्स आणि आयपॅडसाठीच्या ॲपलकेअर प्लसच्या दरात वाढ केल्यानंतर कंपनीने आता ॲपल म्युझिक आणि निवडक ॲपल वन बंडल्सही महाग केले आहेत. कंपनीने या दरवाढीमागे म्युझिक लायसन्सिंगचा वाढता खर्च हे प्रमुख कारण असल्याचे सांगितले आहे. जगभरात सुमारे चार वर्षांनंतर ॲपल म्युझिकच्या दरात ही वाढ करण्यात आली असून यापूर्वी ऑक्टोबर २०२२ मध्ये किंमती वाढल्या होत्या.

भारतातील ग्राहकांसाठी ही दुसरी दरवाढ आहे. यापूर्वी २०२४ च्या अखेरीस इंडिव्हिज्युअल प्लॅनची किंमत ९९ रुपयांवरून ११९ रुपये करण्यात आली होती. आता या प्लॅनसाठी ग्राहकांना दरमहा १३९ रुपये मोजावे लागणार आहेत. सहा जणांसाठी उपलब्ध असलेल्या फॅमिली प्लॅनची किंमत २२९ रुपये प्रतिमहिना करण्यात आली आहे, तर स्टुडंट प्लॅनसाठी ६९ रुपये प्रतिमहिना आकारले जाणार आहेत. याशिवाय ॲपल वन बंडलची सुरुवातीची किंमत आता १९५ रुपये झाली आहे.

अमेरिकेतही या सेवांच्या दरात वाढ करण्यात आली आहे. इंडिव्हिज्युअल प्लॅनची किंमत १०.९९ डॉलर्सवरून ११.९९ डॉलर्स करण्यात आली आहे. फॅमिली प्लॅन १६.९९ डॉलर्सवरून १९.९९ डॉलर्सपर्यंत वाढवण्यात आला असून स्टुडंट प्लॅनची किंमत ५.९९ डॉलर्सवरून ६.९९ डॉलर्स झाली आहे. अमेरिकेतील ॲपल वन फॅमिली आणि प्रीमियर प्लॅनच्या किंमतीतही वाढ करण्यात आली आहे. मात्र इंडिव्हिज्युअल टियरची किंमत १९.९५ डॉलर्सवर कायम ठेवण्यात आली आहे.

दरवाढीनंतरही ॲपल म्युझिक हे आपल्या प्रमुख प्रतिस्पर्धी स्पॉटिफायपेक्षा स्वस्त असल्याचे दिसून येते. स्पॉटिफायने यावर्षीच्या सुरुवातीला अमेरिकेतील प्रीमियम प्लॅनची किंमत १२.९९ डॉलर्स केली होती. त्यामुळे ॲपल म्युझिक अद्याप तुलनेने परवडणारा पर्याय मानला जात आहे. तसेच यूट्यूब म्युझिकने एप्रिल महिन्यात आपल्या इंडिव्हिज्युअल प्लॅनच्या किंमतीत वाढ केली असून आता त्याचे दर ॲपल म्युझिकच्या जवळपास समान झाले आहेत. मात्र भारतात यूट्यूब म्युझिक हे अजूनही प्रमुख म्युझिक स्ट्रिमिंग प्लॅटफॉर्मपैकी सर्वात स्वस्त पर्याय मानले जाते.

दरम्यान, या वाढीव शुल्कातून कलाकारांना प्रत्यक्षात अधिक मोबदला मिळणार का, याबाबत ॲपलने कोणतीही स्पष्ट माहिती दिलेली नाही. त्यामुळे अनेक सबस्क्राइबर्सनी या निर्णयावर प्रश्नचिन्ह उपस्थित केला.

---------------

हिंदुस्थान समाचार / Suraj Chaugule