टोकियो, 28 जुलै (हिं.स.)।जपानच्या दक्षिणेकडील कुमामोटो प्रांतात मंगळवारी जोरदार भूकंप झाला आहे. जपान हवामानशास्त्र संस्थेच्या (जेएमए) माहितीनुसार , या भूकंपाची तीव्रता रिश्टर स्केलवर 7.1 इतकी नोंदवण्यात आली. भूकंपानंतर संस्थेने 1 मीटर (3.28 फूट) उंचीच्या लाटांसह सुनामीचा इशारा जारी केला आहे.

जपान हवामानशास्त्र संस्थेच्या (जेएमए) माहितीनुसार, मंगळवारी जपानच्या क्यूशू प्रदेशातील कुमामोटो प्रांतात रिश्टर स्केलवर 7.1 तीव्रतेचा भूकंप झाला. भूकंपाचे केंद्र कुमामोटो शहराच्या दक्षिणेकडील उकी शहराजवळ होते आणि त्याची खोली सुमारे 10 किलोमीटर होती. हा अत्यंत शक्तिशाली धक्का होता, ज्यामुळे संपूर्ण दक्षिण जपान हादरून गेला. भूकंपानंतर तात्काळ जपान हवामानशास्त्र संस्थेने किनारी भागांसाठी सुनामीचा इशारा जारी केला.तसेच जपान सरकारने क्यूशू बेटावरील कुमामोटो, नागासाकी, कागोशिमा, फुकुओका, सागा, ओइता आणि मियाझाकी या प्रांतांसाठी आपत्कालीन भूकंप इशारा जारी केला आहे. हवामानशास्त्र संस्थेने नागरिकांना समुद्रकिनाऱ्यांपासून आणि समुद्रापासून दूर राहण्याचा सल्ला दिला आहे.

या भूकंपामुळे कुमामोटो प्रांतातील सुमारे 45,600 घरांचा वीजपुरवठा खंडित झाला. स्थानिक वीज कंपनी क्यूशू इलेक्ट्रिकने सांगितले की, प्रभावित भागांमध्ये वीजपुरवठा पूर्ववत करण्याचे काम सुरू आहे. भूकंपाच्या केंद्रबिंदूजवळ (एपिसेंटरजवळ) अनेक इमारती कोसळलेल्या दिसून आल्या. उकी शहराच्या अग्निशमन विभागाने प्रसारमाध्यमांना सांगितले की, शहरातील विविध ठिकाणी आग लागल्यामुळे त्यांना मोठ्या प्रमाणावर आपत्कालीन मदतीसाठी कॉल प्राप्त झाले. वृत्तानुसार, यात्सुशिरो शहरातील क्यूशू एक्स्प्रेसवेवरील महामार्ग उड्डाणपुलाचे (ओव्हरपासचे) मोठे नुकसान झाले आहे. तसेच त्याच शहरातील एका पुलाचा पादचारी मार्गाचा भाग कोसळला आहे. दरम्यान, जेआर क्यूशू या रेल्वे कंपनीने भूकंपानंतर आपल्या सर्व सेवा तात्पुरत्या थांबवल्या असून त्यात वेगवान शिंकान्सेन बुलेट ट्रेन सेवांचाही समावेश आहे.

परिस्थितीचे गांभीर्य लक्षात घेऊन जपान सरकारने दक्षिण क्यूशू बेटावरील अनेक प्रांतांसाठी आपत्कालीन भूकंप इशारा जारी केला आहे. जपान हवामानशास्त्र संस्थेच्या अधिकाऱ्यांनी नागरिकांना संभाव्य पुढील भूकंपांच्या पार्श्वभूमीवर पूर्ण सतर्कता बाळगण्याचे आवाहन केले आहे.कुमामोटो, नागासाकी, कागोशिमा, फुकुओका, सागा, ओइता आणि मियाझाकी या प्रमुख प्रांतांमध्ये इशारा जारी करण्यात आला आहे. प्रशासन परिस्थितीवर सातत्याने लक्ष ठेवून असून नागरिकांनी सुरक्षा सूचनांचे काटेकोरपणे पालन करावे, असे आवाहन करण्यात आले आहे.

पत्रकारांशी संवाद साधताना पंतप्रधान सानाए ताकाइची यांनी भूकंपग्रस्त भागातील नागरिकांना आवाहन केले की, याच तीव्रतेचा आणखी एक भूकंप होण्याची शक्यता लक्षात घेऊन त्यांनी सतर्क राहावे. त्या म्हणाल्या की, या आपत्तीत काही लोक जखमी झाल्याची शक्यता आहे. “नुकसानीचे नेमके प्रमाण अद्याप तपासले जात असले, तरी काही नागरिक जखमी झाल्याची माहिती आम्हाला मिळाली आहे,” असे त्यांनी सांगितले.

---------------

हिंदुस्थान समाचार / Priyanka Bansode