तेहरान , 08 जुलै (हिं.स.)।होर्मुझ सामुद्रधुनीतील जहाजांवरील हल्ल्यानंतर अमेरिकेने पुन्हा एकदा आक्रमक भूमिका घेत तेहरानवर बॉम्बहल्ले सुरू केले आहेत. दुसरीकडे, या कारवाईला प्रत्युत्तर देताना इराणने आता आखाती देशांना लक्ष्य करण्यास सुरुवात केल्याचे वृत्त आहे.

माध्यमांतील वृत्तांनुसार, अमेरिकन हल्ल्यानंतर इराणने कुवैतवर क्षेपणास्त्र आणि ड्रोन हल्ले सुरू केले आहेत. कुवैतच्या सैन्याने अधिकृत निवेदन जारी करून देशावर शत्रूकडून क्षेपणास्त्र आणि ड्रोन हल्ले करण्यात आल्याची माहिती दिली असून, त्याला सैन्य तत्परतेने प्रत्युत्तर देत असल्याचे सांगितले आहे.दरम्यान, सुरक्षेच्या कारणास्तव संपूर्ण कुवैतमध्ये एअर रेड सायरन (हवाई हल्ल्याचा इशारा देणारे सायरन) वाजवण्यात आले आहेत. सरकारी वृत्तसंस्थानेही देशभर सायरन वाजवण्यात आल्याची पुष्टी केली आहे.

कुवैतच्या विविध भागांत स्फोटांचे आवाज ऐकू आल्याने नागरिकांमध्ये चिंतेचे वातावरण निर्माण झाले आहे. मात्र, कुवैती सैन्याने नागरिकांना घाबरून न जाण्याचे आवाहन केले आहे.

सैन्याच्या म्हणण्यानुसार, हे स्फोट शत्रूची क्षेपणास्त्रे आणि ड्रोन हवेतच यशस्वीपणे पाडण्यात आल्यामुळे झाले आहेत. त्यामुळे नागरिकांनी अफवांवर विश्वास ठेवू नये, असेही स्पष्ट करण्यात आले आहे.याशिवाय, कुवैतच्या लष्कराने जनतेला प्रशासन आणि सुरक्षा यंत्रणांकडून जारी करण्यात येणाऱ्या सर्व सुरक्षा सूचनांचे काटेकोर पालन करण्याचे आवाहन केले आहे. नागरिकांना सुरक्षित ठिकाणी राहण्याचा सल्लाही देण्यात आला आहे.

इराण आणि अमेरिका यांच्यात गेल्या महिन्यात, १८ जून रोजी, एक करार (इस्लामाबाद करार) झाला होता. या करारानुसार ६० दिवसांसाठी लढाई थांबवणे आणि व्यापारी जहाजांना सुरक्षित मार्ग उपलब्ध करून देणे यावर दोन्ही देशांमध्ये सहमती झाली होती. मात्र, मंगळवारी इराणच्या इस्लामिक रिव्होल्यूशनरी गार्ड कॉर्प्सने होर्मुझ सामुद्रधुनीत तीन मोठ्या व्यापारी तेलवाहू टँकरांवर क्षेपणास्त्रे आणि ड्रोनद्वारे हल्ले केल्याचा आरोप करण्यात आला. या हल्ल्यांमध्ये सौदी अरेबिया आणि कतारशी संबंधित जहाजांना लक्ष्य करण्यात आले. ओमानच्या किनाऱ्याजवळ एका एलएनजी (द्रवीकृत नैसर्गिक वायू) टँकरलाही आग लागल्याचे वृत्त आहे. तथापि, इराणने दावा केला आहे की संबंधित जहाजांनी त्यांच्याकडून देण्यात आलेल्या इशाऱ्यांकडे दुर्लक्ष केले होते.

इराणच्या या कारवाईनंतर अमेरिकेने तात्काळ आणि अत्यंत कठोर भूमिका घेतली. संघर्षविरामाचे उल्लंघन केल्याचा आरोप करत अमेरिकेच्या सेंट्रल कमांडने इराणमधील अनेक ठिकाणांवर सलग आणि तीव्र हवाई हल्ले केले.

---------------

हिंदुस्थान समाचार / Priyanka Bansode