इस्लामाबाद , 08 जुलै (हिं.स.) कराचीकडे जात असलेले एक पाकिस्तानी मालवाहू (कार्गो) विमान मंगळवारी रात्री अचानक बेपत्ता झाले. या विमानात चालक दलातील पाच सदस्य प्रवास करत होते. विमानाचा रडार आणि हवाई वाहतूक नियंत्रण (एअर ट्रॅफिक कंट्रोल) यांच्याशी संपर्क तुटल्यानंतर पाकिस्तान विमानतळ प्राधिकरणाने (पीएए) समुद्रात मोठ्या प्रमाणावर शोध आणि बचाव मोहीम सुरू केली आहे.

पीएएच्या माहितीनुसार, के-२ एअरवेजच्या बोईंग ७३७ मालवाहू विमानाने मंगळवारी रात्री सुमारे ९.१८ वाजता आपल्या नेव्हिगेशन प्रणालीमध्ये तांत्रिक बिघाड झाल्याची माहिती दिली होती. त्यानंतर कराची एरिया कंट्रोल सेंटर (ACC) कडून विमानाला तातडीने आवश्यक सूचना देण्यात आल्या.पीएएने सांगितले की, रात्री ९.२२ वाजता रडारवर विमान वेगाने खाली येताना दिसले. याचदरम्यान विमानाने अचानक आपली दिशा देखील बदलली. काही वेळातच कराचीपासून सुमारे १५५ नॉटिकल मैल पश्चिमेला विमानाचा रडार आणि संचार संपर्क पूर्णपणे तुटला. घटनेनंतर तात्काळ रेस्क्यू कोऑर्डिनेशन सेंटर सक्रिय करण्यात आले असून विविध सरकारी यंत्रणांच्या मदतीने अरबी समुद्रात शोध आणि बचाव मोहीम सुरू करण्यात आली आहे.

जागतिक विमान उड्डाण ट्रॅकिंग सेवा फ्लाइटराडारच्या प्राथमिक आकडेवारीनुसार, विमान सुरुवातीला उंची गमावत होते. त्यानंतर काही काळ ते पुन्हा वर चढले, मात्र त्यानंतर ते अचानक अत्यंत वेगाने खाली कोसळू लागले.फ्लाइटराडारच्या माहितीनुसार, विमानाकडून प्राप्त झालेल्या शेवटच्या डेटामध्ये त्याची उंची समुद्रसपाटीपासून सुमारे १,१०० फूट (३३५ मीटर) इतकी नोंदवली गेली होती. त्या वेळी विमानाचा खाली उतरण्याचा वेग प्रति मिनिट उणे २२,४०० फूट इतका होता. विमानवाहतूक क्षेत्रातील तज्ज्ञांच्या मते, हा वेग अत्यंत असामान्य आणि अतिशय धोकादायक मानला जातो.

स्थानिक वृत्तानुसार, हे विमान पाकिस्तानच्या बलुचिस्तान प्रांतातील ओरमारा किनाऱ्याजवळ अरबी समुद्रावरून उड्डाण करत असताना बेपत्ता झाले.पीएएने सांगितले की, विमानाचा शोध घेण्यासाठी अनेक यंत्रणा समुद्रात तैनात करण्यात आल्या असून शोधमोहीम सातत्याने सुरू आहे.

माहितीनुसार, हे विमान पाकिस्तानच्या खासगी मालवाहू विमान कंपनी के-२ एअरवेजचे होते. ही कंपनी देशांतर्गत तसेच आंतरराष्ट्रीय स्तरावर नियमित आणि चार्टर मालवाहतूक उड्डाणे चालवते.हे बोईंग ७३७ विमान मूळतः प्रवासी विमान म्हणून तयार करण्यात आले होते. त्याचे उत्पादन १९९९ मध्ये झाले होते. सुरुवातीला त्याचे संचालन रशियाची एअरोफ्लोट आणि इंडोनेशियाची गरुडा इंडोनेशिया एअरलाइन्स या विमान कंपन्यांकडून करण्यात आले. यानंतर २०१२ मध्ये या विमानाचे रूपांतर मालवाहू (कार्गो) विमानामध्ये करण्यात आले होते.

---------------

हिंदुस्थान समाचार / Priyanka Bansode