रायगड, 05 ऑगस्ट (हिं.स.)। जिल्ह्यातील माणगाव तालुक्यात सायबर गुन्हेगारांच्या 'म्युल अकाउंट' रॅकेटचा मोठा पर्दाफाश झाला असून सायबर फसवणुकीसाठी बँक खाती उपलब्ध करून देणाऱ्या सहा जणांविरुद्ध माणगाव आणि गोरेगाव पोलिसांनी गुन्हे दाखल केले आहेत. या प्रकरणात सुमारे १ कोटी ७० लाख रुपयांहून अधिक संशयास्पद आर्थिक व्यवहार झाल्याचे तपासात समोर आले आहे.

पोलिसांनी दिलेल्या माहितीनुसार, सायबर फसवणुकीतून मिळालेली रक्कम वळविण्यासाठी आरोपींनी स्वतःच्या नावाने उघडलेली बँक खाती कमिशनच्या मोबदल्यात गुन्हेगारांना वापरण्यास दिली होती. गोरेगाव पोलीस ठाण्याच्या हद्दीतील तीन वेगवेगळ्या प्रकरणांमध्ये बँक ऑफ इंडिया आणि बँक ऑफ महाराष्ट्र येथील खात्यांमधून सुमारे ६९ लाख ६४ हजार रुपयांची संशयास्पद उलाढाल झाल्याचे निष्पन्न झाले आहे.

तसेच, माणगाव पोलीस ठाण्याच्या हद्दीतील एका प्रकरणात बँक ऑफ इंडियामध्ये नव्याने उघडलेल्या खात्यातून ४७ लाख ३३ हजार रुपयांचे व्यवहार झाल्याचे तपासात आढळले आहे. आणखी एका खात्यात ३ लाख ६६६ रुपयांची उलाढाल झाल्याची नोंद असून, या व्यवहारांबाबत गुजरातमधील अहमदाबाद येथेही सायबर फसवणुकीचा गुन्हा दाखल असल्याची माहिती समोर आली आहे.

या प्रकरणी सायबर गुन्ह्यांमधील पैशांची देवाणघेवाण सुलभ करण्यासाठी जाणीवपूर्वक बँक खाती उपलब्ध करून दिल्याचा ठपका ठेवत संबंधित आरोपींविरुद्ध भारतीय न्याय संहिता (बीएनएस) मधील विविध कलमांन्वये गुन्हे दाखल करण्यात आले आहेत.

पोलिसांनी नागरिकांना आवाहन केले आहे की, कमिशन किंवा आर्थिक लाभाच्या आमिषाला बळी पडून स्वतःचे बँक खाते, एटीएम कार्ड, पासबुक, धनादेश किंवा इंटरनेट बँकिंगची माहिती इतरांना देऊ नये. असे केल्यास संबंधित व्यक्तीही सायबर गुन्ह्यात सहआरोपी ठरू शकते. या रॅकेटमध्ये आणखी किती जणांचा सहभाग आहे, याचा माणगाव आणि गोरेगाव पोलीस सखोल तपास करत असून, नॅशनल सायबर क्राईम रिपोर्टिंग पोर्टलवरील तांत्रिक माहितीच्या आधारे तपासाची व्याप्ती वाढविण्यात आली आहे.

---------------

हिंदुस्थान समाचार / संदेश साळुंके (रायगड)