मुंबई, 15 सप्टेंबर (हिं.स.)। सुशांत सिंह राजपूतची माजी व्यवस्थापक दिशा सालियानच्या मृत्यू प्रकरणात नाव समोर आल्यानंतर अभिनेता सूरज पंचोलीने प्रतिक्रिया दिली आहे. वृत्तांनुसार, २०२० मध्ये झालेल्या दिशा सालियानच्या मृत्यूशी संबंधित प्रकरणात केंद्रीय अन्वेषण विभागाने (सीबीआय) १७ जणांविरोधात प्रथम माहिती अहवाल (एफआयआर) दाखल केला आहे. यामध्ये सूरज पंचोलीचे नावही असल्याचे सांगितले जात आहे. आता अभिनेत्याने समाजमाध्यमावरून या प्रकरणाशी कोणत्याही प्रकारचा संबंध असल्याचा इन्कार केला आहे.

सूरजने आपल्या इन्स्टाग्राम स्टोरीमध्ये सांगितले की, तो आपल्या आयुष्यात कधीही दिशाला प्रत्यक्ष किंवा अप्रत्यक्षपणे भेटलेला नाही. त्याने आदित्य ठाकरे यांनाही कधी भेटलो नसल्याचे स्पष्ट केले. अभिनेता म्हणाला की, गेल्या अनेक वर्षांपासून कोणत्याही पुराव्याशिवाय त्याचे नाव या प्रकरणाशी जोडले जात आहे. त्याने सांगितले की, पोलीस आणि सीबीआयने सुमारे चार-पाच वर्षांपूर्वीच त्याचा जबाब नोंदवला आहे. सूरजने म्हटले की, त्याच्याकडे लपवण्यासारखे काहीही नाही.

अभिनेत्याने पुढे सांगितले की, तो बराच काळ या प्रकरणावर मौन बाळगून होता; मात्र आता सातत्याने त्याचे नाव अशा घटनेशी जोडले जाणे तो स्वीकारणार नाही, जिच्याशी त्याचा कोणताही संबंध नाही. तो म्हणाला की, तपास यंत्रणेला पुन्हा त्याची चौकशी करायची असल्यास तो पूर्णपणे सहकार्य करण्यास तयार आहे. सूरजने लोकांना या प्रकरणाशी संबंधित कोणत्याही व्यक्तीबाबत मत बनवण्यापूर्वी वस्तुस्थितीची पडताळणी करण्याचे आवाहन केले. वृत्तांनुसार, एफआयआरमध्ये आदित्य ठाकरे, डिनो मोरिया आणि रिया चक्रवर्ती यांच्यासह १७ जणांची नावे असल्याचे सांगितले जात आहे.

---------------

हिंदुस्थान समाचार / Suraj Chaugule