पुडुचेरी, 25 सप्टेंबर (हिं.स.)। शम्स मुलानीच्या शानदार गोलंदाजीच्या जोरावर भारत ‘अ’ने पहिल्या अनौपचारिक कसोटी सामन्यात ऑस्ट्रेलिया ‘अ’चा १६२ धावांनी पराभव केला. या विजयासह भारत ‘अ’ने दोन सामन्यांच्या मालिकेत १-० अशी आघाडी घेतली. चौथ्या दिवशी शुक्रवारी ३६३ धावांच्या लक्ष्याचा पाठलाग करताना ऑस्ट्रेलिया ‘अ’चा संघ दुसऱ्या डावात ५५.१ षटकांत २०० धावांवर सर्वबाद झाला.
ऑस्ट्रेलिया ‘अ’ने दिवसाची सुरुवात दोन गडी बाद ५५ धावांपासून केली. विजयासाठी त्यांना आणखी ३०८ धावांची गरज होती. मात्र, भारतीय गोलंदाजांनी सुरुवातीपासूनच ऑस्ट्रेलियावर दबाव कायम ठेवला. वेगवान गोलंदाज अंशुल कंबोजने सुरुवातीचे धक्के दिले. नॅथन मॅकस्विनी गलीमध्ये झेलबाद झाला, तर दोन षटकांनंतर पीटर हँड्सकॉम्बला कमी उसळी घेणाऱ्या चेंडूवर त्रिफळाचीत केले.
यानंतर तुषार देशपांडेने शानदार रिव्हर्स स्विंगचे प्रदर्शन करत ऑस्ट्रेलिया ‘अ’च्या डावाला आणखी धक्के दिले. त्याने जोश फिलिपला त्रिफळाचीत केले आणि त्यानंतर सलग दुसऱ्या चेंडूवर लियाम स्कॉटलाही तंबूत पाठवले. देशपांडेने दुसऱ्या डावात १४ धावा देत तीन विकेट्स घेतल्या.
जेसन सांघाला ११ धावांवर यष्टिचीत करण्याची संधी मिळाली. याच षटकात त्याच्याविरुद्ध पायचीतची अपीलही करण्यात आली, मात्र भारताने रिव्ह्यू घेतला नाही. मात्र, सांघा फार काळ टिकू शकला नाही. तनुश कोटियानच्या गोलंदाजीवर स्लॉग स्वीपचा प्रयत्न करताना तो २६ धावांवर त्रिफळाचीत झाला.
यानंतर फर्गस ओ'नील आणि टॉड मर्फी यांनी आठव्या विकेटसाठी ६७ धावांची भागीदारी करत ऑस्ट्रेलिया ‘अ’चा पराभव काही काळ लांबवला. सामन्यातील ऑस्ट्रेलिया ‘अ’ची ही एकमेव अर्धशतकी भागीदारी ठरली.
उपाहारानंतर भारत ‘अ’ला विजयासाठी केवळ ६.१ षटके लागली. शम्स मुलानीने ओ'नीलचा डीप मिडविकेटवर झेलबाद करत ऑस्ट्रेलियाला आणखी एक धक्का दिला. त्यानंतर मर्फीचा बी. साई सुदर्शनने लेग गलीमध्ये शानदार झेल घेतला. ब्रेंडन डोगेटचा झेल शेख रशीदने लॉन्ग ऑफवर पुढे झेप घेत पकडला आणि ऑस्ट्रेलिया ‘अ’चा डाव २०० धावांवर संपुष्टात आला.
मुलानीने सामन्यात एकूण सात विकेट्स घेतल्या. त्याने पहिल्या डावात चार, तर दुसऱ्या डावात तीन विकेट्स घेतल्या. तुषार देशपांडेने दुसऱ्या डावात तीन, तर अंशुल कंबोजने दोन विकेट्स घेतल्या.
यापूर्वी भारत ‘अ’ने पहिल्या डावात कुमार कुशाग्रच्या ११३ आणि तनुश कोटियानच्या ६९ धावांच्या जोरावर ३३४ धावा केल्या होत्या. दुसऱ्या डावात देवदत्त पडिक्कलने ५९, तर कुशाग्रने नाबाद ४६ धावा करत भारत ‘अ’समोर ३६३ धावांचे लक्ष्य ठेवले.
संक्षिप्त धावफलक :
भारत ‘अ’ : ३३४ आणि १९९ (देवदत्त पडिक्कल ५९, कुमार कुशाग्र नाबाद ४६; टॉड मर्फी ४/४८)
ऑस्ट्रेलिया ‘अ’ : १७१ आणि २०० (फर्गस ओ'नील ४७; तुषार देशपांडे ३/१४, शम्स मुलानी ३/५७, अंशुल कंबोज २/२५)
निकाल : भारत ‘अ’ १६२ धावांनी विजयी.
दुसरा अनौपचारिक कसोटी सामना याच मैदानावर खेळवला जाणार असून, त्यात ऑस्ट्रेलिया ‘अ’चा संघ पुनरागमन करण्याचा प्रयत्न करेल.
---------------
हिंदुस्थान समाचार / Suraj Chaugule
