गिफू (जापान), 25 सप्टेंबर (हिं.स.)। भारतीय महिला हॉकी संघाने शुक्रवारी आशियाई खेळ २०२६ मधील पूल बीच्या महत्त्वपूर्ण सामन्यात यजमान जपानचा ३-१ असा पराभव करत उपांत्य फेरीत स्थान पक्के केले. गिफू प्रीफेक्चुरल ग्रीन स्टेडियमवर मिळवलेल्या या विजयासह भारताने सलग चौथा विजय नोंदवत पूलमध्ये पहिल्या दोन संघांमध्ये आपले स्थान निश्चित केले.भारताकडून लालरेमसियामी, इशिका चौधरी आणि नवनीत कौर यांनी गोल केले, तर जपानकडून शिहो कोबायाकावा हिने एक गोल केला.

भारताने सामन्याची सुरुवात आक्रमक अंदाजात केली. पहिल्या क्वार्टरमध्ये नवनीत कौरचा प्रयत्न जपानची गोलरक्षक यू कुडो हिने रोखला. मात्र, रिबाउंडवर लालरेमसियामीने वेगाने हालचाल करत चेंडू गोलमध्ये पाठवला आणि भारताला आघाडी मिळवून दिली. जपानने बरोबरी साधण्याचा प्रयत्न केला, मात्र भारतीय गोलरक्षक सविता पुनियाने माही उएनोच्या पेनल्टी कॉर्नरच्या प्रयत्नावर शानदार बचाव केला.

दुसऱ्या क्वार्टरमध्ये भारताने दबाव वाढवला आणि मध्यंतराच्या काही क्षण आधी आपली आघाडी दुप्पट केली. नवनीतच्या पेनल्टी कॉर्नरच्या प्रयत्नाला जपानच्या बचावफळीने रोखले. मात्र, इशिका चौधरीने रिबाउंडवर सतर्कता दाखवत गोल केला आणि भारताला २-० अशी आघाडी मिळवून दिली. तिसऱ्या क्वार्टरमध्ये नवनीत कौरने जपानच्या बचावफळीला चकवत शानदार गोल केला आणि भारताची आघाडी ३-० अशी केली.अंतिम क्वार्टरमध्ये जपानने पुनरागमनाचा प्रयत्न केला. शिहो कोबायाकावाने जोरदार टॉमहॉकच्या माध्यमातून गोल करत अंतर ३-१ असे कमी केले. मात्र, त्यानंतर भारतीय संघाने जपानचा दबाव निष्प्रभ करत सामना आपल्या नावावर केला.

या विजयामुळे भारताचे चार सामन्यांत चार विजयांसह १२ गुण झाले असून पूल बीमध्ये पहिल्या दोन संघांमध्ये त्याचे स्थान निश्चित झाले आहे. जपान नऊ गुणांसह दुसऱ्या स्थानावर आहे, तर थायलंडही उर्वरित सामना जिंकून १२ गुणांपर्यंत पोहोचू शकतो. मात्र, जपान आणि थायलंड यांचा त्यांच्या अखेरच्या पूल सामन्यात एकमेकांशी सामना होणार असल्याने दोन्ही संघांना एकाच वेळी भारताच्या १२ गुणांपर्यंत पोहोचणे शक्य नाही. भारत आता रविवारी पूल बीमधील आपल्या अखेरच्या सामन्यात सिंगापूरचा सामना करणार आहे. भारताने २०२३ मधील हांगझोऊ आशियाई खेळांमध्ये कांस्यपदक जिंकले होते.

---------------

हिंदुस्थान समाचार / Suraj Chaugule