नगोया(जपान), 25 सप्टेंबर (हिं.स.)। भारताची सुरुचि सिंह आणि कमलजीत या जोडीने शुक्रवारी आशियाई खेळ २०२६ मध्ये १० मीटर एअर पिस्तूल मिश्र सांघिक स्पर्धेत शानदार कामगिरी करत सुवर्णपदक जिंकले. यासह भारताच्या खात्यात या स्पर्धेतील दुसरे सुवर्णपदक जमा झाले.भारतीय जोडीने अंतिम फेरीत ४८४.६ गुण मिळवत सुवर्णपदकावर नाव कोरले आणि नवा आशियाई विक्रमही प्रस्थापित केला.

दक्षिण कोरियाने ४७८.० गुणांसह रौप्यपदक, तर इराणने ४१५.८ गुणांसह कांस्यपदक जिंकले. इंडोनेशियाला ३४९.४ गुणांसह चौथ्या स्थानावर समाधान मानावे लागले आणि तो पदकाच्या शर्यतीतून बाहेर पडला.सुरुचि आणि कमलजीत यांनी अंतिम फेरीची सुरुवात शानदार पद्धतीने केली. पहिल्या मालिकेत भारतीय जोडीने १०३ गुण मिळवत आघाडी घेतली. दुसऱ्या मालिकेत ९९.४ गुण आणि तिसऱ्या मालिकेत १०१.१ गुण मिळवत भारताने एकूण ३०३.५ गुणांसह आपली आघाडी कायम ठेवली.अंतिम फेरीच्या दुसऱ्या टप्प्यातही भारतीय जोडीचे वर्चस्व कायम राहिले. पहिल्या मालिकेत ६१.२ गुण मिळवल्यानंतर भारताची गुणसंख्या ३६४.७ वर पोहोचली. त्यानंतर दुसऱ्या मालिकेत ६०.२ गुणांची भर घालत भारतीय जोडीने एकूण ४२४.९ गुण मिळवले आणि दक्षिण कोरियावर ८.४ गुणांची आघाडी घेतली.

दक्षिण कोरियाने अंतिम मालिकेत पुनरागमन करण्याचा प्रयत्न केला. मात्र, सुरुचि आणि कमलजीत यांनी दबावाच्या परिस्थितीत शानदार कामगिरी करत ४८४.६ गुणांसह सुवर्णपदक निश्चित केले. भारतीय जोडीची आघाडी रौप्यपदक विजेत्या दक्षिण कोरियापेक्षा ६.६ गुणांची राहिली. भारतीय जोडीचा हा स्कोअर जागतिक विक्रमापेक्षा चार गुणांनी कमी राहिला.या कामगिरीसह भारताने या स्पर्धेतील आशियाई विक्रमही आपल्या नावावर केला. यापूर्वी उझबेकिस्तानने याच वर्षी नवी दिल्ली येथे झालेल्या आशियाई नेमबाजी अजिंक्यपद स्पर्धेदरम्यान ४८१.३ गुणांसह हा विक्रम नोंदवला होता.

सुरुचिचा शानदार प्रवास

हरियाणातील झज्जर येथील सुरुचि सिंहने वयाच्या १३व्या वर्षी नेमबाजीला सुरुवात केली. तिने २०२५ मध्ये ब्यूनस आयर्स, लिमा आणि म्युनिक येथे सलग तीन वैयक्तिक आयएसएसएफ विश्वचषक सुवर्णपदके जिंकली. लिमामध्ये तिने मिश्र सांघिक प्रकारातही सुवर्णपदक मिळवले.

२०२५ मध्ये दोहा विश्वचषकाच्या अंतिम फेरीत तिने १० मीटर एअर पिस्तूलमध्ये २४५.१ गुणांसह कनिष्ठ जागतिक विक्रम नोंदवत सुवर्णपदक जिंकले. २०२६ मध्ये म्युनिक विश्वचषकातही तिने सुवर्णपदक मिळवले. नवी दिल्ली येथे झालेल्या २०२६ आशियाई नेमबाजी अजिंक्यपद स्पर्धेत तिने १० मीटर एअर पिस्तूल मिश्र सांघिक प्रकारात रौप्यपदक जिंकले होते.

कमलजीतनेही निर्माण केली वेगळी ओळख

हरियाणातील रेवाडी जिल्ह्यातील सुलखा येथील रहिवासी असलेला कमलजीत १० मीटर एअर पिस्तूल आणि ५० मीटर पिस्तूल या प्रकारांत सहभागी होतो. त्याने २०१९ मध्ये नेमबाजीला सुरुवात केली. २०२३ मध्ये चांगवोन येथे झालेल्या आयएसएसएफ कनिष्ठ विश्व अजिंक्यपद स्पर्धेत त्याने ५० मीटर पिस्तूल वैयक्तिक आणि सांघिक प्रकारात सुवर्णपदके जिंकली.२०२५ च्या आयएसएसएफ विश्व अजिंक्यपद स्पर्धेत त्याने ५० मीटर पिस्तूल सांघिक प्रकारात रौप्यपदक जिंकले, तर २०२६ एशियाई अजिंक्यपद स्पर्धेत ५० मीटर पिस्तूल वैयक्तिक प्रकारातही रौप्यपदक मिळवले. या सुवर्णपदकासह आशियाई खेळांमध्ये भारताची सुवर्णपदकांची संख्या आता दोन झाली आहे. यापूर्वी भारतीय महिला क्रिकेट संघाने श्रीलंकेचा १४७ धावांनी पराभव करत सुवर्णपदक जिंकले होते.

---------------

हिंदुस्थान समाचार / Suraj Chaugule