ढाका, 29 सप्टेंबर (हिं.स.)। बांगलादेशला पाकिस्तानकडून धक्का बसल्याचे समोर आले आहे. बांगलादेशातील रूपपूर अणुऊर्जा प्रकल्पासाठी होणारा अणुइंधनाचा पुरवठा प्रभावित झाला आहे. यामागे पाकिस्तान असल्याचे सांगितले जात आहे. पाकिस्तानकडून हवाई क्षेत्र वापरण्यास मंजुरी न मिळाल्याने युरेनियम घेऊन येणारे मालवाहू विमान बांगलादेशात पोहोचू शकले नाही.

बांगलादेशचे विज्ञान आणि तंत्रज्ञान मंत्री फकीर महबूब अनाम यांनी सांगितले की, रूपपूर अणुऊर्जा प्रकल्पासाठी युरेनियम घेऊन येणारे मालवाहू विमान २४ सप्टेंबर रोजी बांगलादेशात पोहोचणे अपेक्षित होते. मात्र, विमानाला पाकिस्तानी हवाई क्षेत्राचा वापर करण्याची परवानगी मिळाली नाही. त्यामुळे युरेनियम ठरलेल्या वेळेत बांगलादेशात पोहोचू शकले नाही. पाकिस्तानने हवाई क्षेत्र वापरण्यास मंजुरी का दिली नाही, यामागील कारण अद्याप स्पष्ट झालेले नाही, असे मंत्र्यांनी सांगितले.आता युरेनियम बांगलादेशात पोहोचण्याची नवी तारीख निश्चित करण्यात आली आहे. रशियाकडून हे युरेनियम ऑक्टोबरच्या पहिल्या आठवड्यात बांगलादेशात पोहोचण्याची शक्यता व्यक्त करण्यात आली आहे.

बांगलादेशच्या विज्ञान आणि तंत्रज्ञान मंत्रालयाचे संयुक्त सचिव शेख मोहम्मद तौहिदुल इस्लाम यांनीही या प्रकरणाची माहिती दिली. त्यांनी सांगितले की, युरेनियम घेऊन येणाऱ्या विमानाच्या स्वागतासाठी विमानतळावर सर्व तयारी पूर्ण करण्यात आली होती आणि सर्व अधिकारी विमानाची प्रतीक्षा करत होते.

रोसाटॉमच्या संपर्क अधिकाऱ्याने सांगितले की, त्यांना हवाई क्षेत्र वापरण्याची मंजुरी मिळालेली नव्हती. त्यामुळे युरेनियम पाठवणे शक्य झाले नाही. आता त्याचे पुन्हा वेळापत्रक निश्चित करावे लागणार आहे. मात्र, कोणत्या देशाने हवाई क्षेत्राच्या वापरावर बंदी घातली होती, हे अधिकाऱ्याने स्पष्ट केले नाही.

रूपपूर अणुऊर्जा प्रकल्प हा बांगलादेशातील पहिला अणुऊर्जा प्रकल्प आहे. रशियाच्या सरकारी अणुऊर्जा महामंडळ रोसाटॉमच्या तंत्रज्ञानाच्या मदतीने या प्रकल्पाचे बांधकाम करण्यात येत आहे. बांगलादेश अणुऊर्जा आयोग या प्रकल्पावर देखरेख करत आहे.

बांगलादेशच्या पाबना जिल्ह्यातील ईश्वरडी उपजिल्ह्यातील पाकशी युनियनमधील पद्मा नदीच्या काठावर असलेल्या रूपपूर गावात हा प्रकल्प उभारला जात आहे. या प्रकल्पात तिसऱ्या पिढीतील दोन व्हीव्हीईआर-१२०० अणुभट्टी युनिट उभारण्यात येत आहेत. या दोन्ही युनिटची एकूण क्षमता २,४०० मेगावॅट इतकी असून, त्यातून बेसलोड वीज निर्मिती केली जाणार आहे.

---------------

हिंदुस्थान समाचार / Priyanka Bansode