मुंबई, 30 सप्टेंबर (हिं.स.)। रेनो इंडियाने आपल्या सात आसनी ट्रायबरमध्ये अखेर टर्बो पेट्रोल इंजिन सादर केले आहे. कंपनीने ‘ट्रायबर १०० पीएस’ या नावाने हे नवीन मॉडेल भारतीय बाजारात लाँच केले असून, त्याची सुरुवातीची एक्स-शोरूम किंमत ७.८४ लाख रुपये आहे. ट्रायबरची कमी पॉवर ही आतापर्यंतची प्रमुख कमतरता मानली जात होती. विशेषतः गाडीमध्ये संपूर्ण कुटुंब किंवा मित्रांचा ग्रुप प्रवास करताना या मर्यादेचा अनुभव येत होता. आता नवीन टर्बो इंजिनच्या माध्यमातून रेनोने ही समस्या दूर करण्याचा प्रयत्न केला आहे.

ट्रायबर १०० पीएसमध्ये १.० लिटर, तीन सिलिंडरचे टीसीई टर्बो पेट्रोल इंजिन देण्यात आले आहे. हे इंजिन १०० पीएस पॉवर आणि १८० एनएम टॉर्क निर्माण करते. त्यासोबत पाच-स्पीड मॅन्युअल गिअरबॉक्स देण्यात आला आहे. याउलट, ट्रायबरच्या जुन्या नॅचरल अॅस्पिरेटेड पेट्रोल इंजिनमधून ७२ पीएस पॉवर आणि ९६ एनएम टॉर्क मिळतो. कंपनीच्या दाव्यानुसार, नवीन टर्बो मॉडेल २१ किलोमीटर प्रति लिटरपर्यंत मायलेज देते. हे इंजिन रेनो किगरमधून घेतले असले तरी त्यात नवीन इंजिन मॅनेजमेंट सिस्टिम आणि ब्रशलेस डीसी कूलिंग फॅनसह काही बदल करण्यात आले आहेत. त्यामुळे ओव्हरटेकिंग, चढाव तसेच गाडी पूर्ण क्षमतेने भरलेली असताना अधिक चांगली कामगिरी मिळण्याची अपेक्षा आहे.

टर्बो इंजिन सध्या केवळ मॅन्युअल गिअरबॉक्ससोबत उपलब्ध आहे. हे इंजिन इव्होल्यूशन, टेक्नो आणि इमोशन या व्हेरिएंटमध्ये मिळेल. त्यांची किंमत अनुक्रमे ७.८४ लाख, ८.५३ लाख आणि ८.९९ लाख रुपये आहे. ऑथेंटिक व्हेरिएंटमध्ये मात्र केवळ सामान्य पेट्रोल इंजिन उपलब्ध राहणार आहे. भविष्यात टर्बो इंजिनसोबत सीएनजी आणि सीव्हीटी पर्याय येण्याची शक्यता व्यक्त केली जात असली, तरी कंपनीने याबाबत अधिकृत घोषणा केलेली नाही.

नवीन ट्रायबरमध्ये सस्पेन्शन ट्युनिंगमध्ये बदल, पुढील व मागील अँटी-रोल बार, एमटीव्ही डॅम्पर तंत्रज्ञान आणि सुधारित ब्रेकिंग देण्यात आले आहे. एबीएस, टीसीएस आणि व्हीडीसीच्या सेटिंगमध्येही बदल करण्यात आले आहेत. सीटिंगमध्येही लवचिकता असून, पाच, सहा किंवा सात आसनी मांडणी करता येते. पाच आसनी मांडणीत बूट स्पेस ६२५ लिटरपर्यंत मिळतो.

फीचर्समध्ये ८ इंचांची टचस्क्रीन, वायरलेस अँड्रॉइड ऑटो आणि अॅपल कारप्ले, ७ इंचांचा डिजिटल ड्रायव्हर डिस्प्ले, ऑटोमॅटिक क्लायमेट कंट्रोल, क्रूझ कंट्रोल, वायरलेस चार्जर आणि रेन-सेंसिंग वायपरचा समावेश आहे. सुरक्षेसाठी सहा एअरबॅग्ज, टायर प्रेशर मॉनिटरिंग आणि आयएसओफिक्स माउंट्स देण्यात आले आहेत. भारतीय बाजारात ट्रायबर १०० पीएसची स्पर्धा मारुती एर्टिगा, टोयोटा रुमियन, किया कॅरेन्स, मारुती एक्सएल६ आणि किया कॅरेन्स क्लॅव्हिससारख्या मॉडेल्सशी होणार आहे.

---------------

हिंदुस्थान समाचार / Suraj Chaugule